Fa

Fa bɛ sɔrɔ baganfatɔ dɔ ka kinni de fɛ i n’a fɔ wuluw, jakumaw, sow, tonsow. Nka bagan wɛrɛw fana bɛ se ka a bila mɔgɔ la.

Fa taamasiɲɛw

Bagan na:

• A kɛcogo bɛ yɛlɛma. Tuma dɔw la, a bɛ farinya.
• A da bɛ kanga, a tɛ se ka dumunikɛ walima ka ji min.
• Tuma dɔw la, bagan yecogo bɛ yɛlɛma (fatɔ) ani a bɛ se ka a kɛrɛfɛfɛn bɛɛ kin o waati la.
• Bagan bɛ sa tile 5 walima tile 7 kɔnɔ.

Mɔgɔkɔrɔba la:

• Kinda bɛ dimi ani a bɛ a tigi sɔgɔ sɔgɔ.
• A ninakili bɛ to ka tigɛtigɛ i n’a fɔ mɔgɔ min bɔra ka kasi.
• Dumuni kununi ka gɛlɛn a bolo. A bɛ daji bɔ kosɛbɛ. Minnɔgɔ bɛ a sɛgɛn barisa jimin ma di a ye.
• Waati dɔw la a bɛ a masumaya, waati dɔw la, a bɛ dimi a yɛrɛ ma.
• A laban a bɛ to ka ja min ka jugu ani ka muluku sani a ka sa.

Ni aw sɔmina ko bagan fatɔ de ye mɔgɔ dɔ kin:

• Aw bɛ bagan in siri walima ka a bila soni dɔ kɔnɔ ka dɔgɔkun kelen kɛ.
• Aw bɛ kinda ko ni safinɛ ni jisuma ye min bɛ wele ko pirɔkisidi didɔrɔzɛni (peroxyde d’hydrogène). Aw kana joginda datugu, aw bɛ a dayɛlɛlen to.
• Ni bagan sara sani dɔgɔkun ka ban (walima ni a fagara, walima ni a ma sɔrɔ ka a minɛ), aw bɛ taa ni a ka mɔgɔ kinnen ye kɛnɛyaso dɔ la ka fakɛlɛpikiri dɔw kɛ a la.

Fa taamasiɲɛ fɔlɔw bɛ daminɛ tile 10 ni san 2 cɛ kinni kɔfɛ, nka a bɛ se ka ye hali san 2 fana kɔfɛ nka tuma dɔw la, a taamasiɲɛw bɛ se ka daminɛ dɔgɔkun 3 ni dɔgɔkun 7 cɛ kinni kofɔ. Ni mɔgɔ min bolo ma ci ka kɔn taamasiɲɛw yeli ɲɛ, fura foyi tɛ se ka a tigi ni kisi.

A kunbɛncogo:

• Ni aw sɔmina dɔrɔn ko fa bɛ bagan dɔ la, aw bɛ a faga ka a su don dingɛ kɔnɔ (walima ka a bila soni dɔ kɔnɔ dɔgɔkun kelen ɲɔgɔn).
• Aw ni bagandɔgɔtɔrɔw bɛ jɛ ka fura di wuluw ma.
• Aw bɛ denmisɛnw yɔrɔ janya baganw na, bagan minnu kɛcogo ma aw diya.

📖 Gafe kɔnɔkow
← Segin kɔfɛ | Taa ɲɛfɛ →