Joli min sababu ye kinnifɛn dɔ ye (Leishmaniose)

Nin bana kofɔlen bɛ sɔrɔ Farafinna, indu jamana kan, arabula, ameriki cɛmancɛ la ani ameriki worodugu fɛ. A bana bɛ sɔrɔ fɛnɲɛnamani dɔ ka kinni fɛ.

A bana suguya dɔw dimi ka jugu. U dɔn man di, wa u furakɛli ka gɛlɛn. O la, aw ka kan ka taa dɔgɔtɔrɔso la.

A suguya dɔw bɛ bɔ wolo dɔrɔn de la. Olu furakɛ ka nɔgɔ.

A taamasiɲɛw:

• Dɔgɔkun 2 ka taa bila dɔgɔkun 8 na fɛnɲɛnamani ka kinni kɔ, a yɔrɔ bɛ funu.
• Funu bɛ nɛ ta ka ci.
• A joliw bɛ se ka kɛnɛya u yɛrɛ ma, nka a dɔw bɛ se ka dɔgɔkun caman kɛ fo ka taa bila san 2 la.
• A joliw bɛ se ka juguya yɔrɔnin kelen.

A furakɛcogo:

• Aw bɛ joli ko ni jiwɔlɔkɔlen ye.
• Aw bɛ fini jɛlen dɔ su jikalan na ka a da joli da la (a kana kalaya kosɛbɛ) miniti 10 fo miniti 15.
• Aw bɛ o kɛ don o don siɲɛ 2 fo tile 10. O furakɛlicogo bɛ a kɛnɛya joona.
• Ni a joli ka jugu (a bilennen don ka dimi kɛ a la), aw bɛ banakisɛ­fagalan dɔw di a tigi ma (aw ye gafe ɲɛ Sigida 25 Gafe in kɔnɔ fura kofɔlenw tacogo lajɛ).

📖 Gafe kɔnɔkow
← Segin kɔfɛ | Taa ɲɛfɛ →