Farigan min bɛ mɔgɔ bila kumakuntan fɔ la (La Dengue)

Tuma dɔw, mɔgɔw bɛ nin bana in ni sumaya kɛ bana kelen ye. A bɛ sɔrɔ banakisɛ fɛ, soso bɛ min jɛnsɛn. San laban ninnu kɔnɔ, a kɛra forobana ye jamana caman na. Tuma dɔw la, a bɛ mɔgɔ caman minɛ waati kelen na, kɛrɛn­kɛrɛnnenya la, samiya waati. Nin bana in bɛ se ka mɔgɔ minɛ siɲɛ caman. Bana minnu bɛ taa ka segin, olu tɛ bana ɲumanw ye.

Walasa ka bana in kɛlɛ, aw ye fɛɛrɛ tigɛ sosow la, ka aw tanga u ka kinni ma i n’a fɔ a ɲɛfɔlen don sanfɛ cogomin.

A taamasiɲɛw

• Farigan cunnen ni nɛnɛ.
• Farifanbɛɛdimi, kungolodimi, kankɔnɔdimi.
• Bana tɔɔrɔ bɛ bonya, banabagatɔ fanga bɛ dɔgɔya, ka ɲɛmanɔgɔsi.
• Tile 3 ka se tile 4 ma, banabagatɔ fari bɛ lafiya lɛri damadɔ ka se tile 2 ma.
• O kɔ, bana bɛ segin tile 1 walima tile 2, tuma dɔw la nɔbilenman bɛ bɔ tɛgɛkɔnɔnaw ni senkɔnɔnaw na.
• Nɔbilenman bɛ tila ka jɛnsɛn bolokala ni senkalaw la, a laban na, a bɛ bɔ farikolo fan bɛɛ la. A ka ca a la, a tɛ bɔ ɲɛda la.
• Nin bana jugumanba in bɛ se ka na ni wolokɔrɔbasibɔn ye (nɔfimanw), walima ka joli jigin banabagatɔ kɔnɔ. Ni o kɛra, aw bɛ taa dɔgɔtɔrɔso la joona.

A furakɛcogo

• Furasi tɛ se ka bana in kɛnɛya, a bɛ ban a yɛrɛ ma tile damadɔ kɔfɛ.
• Aw bɛ aw lafiɲɛbɔ, ka ji caman min, i n’a fɔ kɛnɛyaji, jiridenjiw walima nɔnɔ. Aw bɛ asetaminofɛni (acetaminophène) fana ta, nka aw kana asipirini (aspirine) walima ibiporofɛni (ibuprofène) ta farigan ni dimi na.
• Ni basibɔn juguman don, aw bɛ o degun furakɛ (aw ye gafe ɲɛ Kirinni lajɛ).

📖 Gafe kɔnɔkow
← Segin kɔfɛ | Taa ɲɛfɛ →