Sigida 19 Denbaw ni matɔrɔniw ka kunnafoniw
Nin waati la, koli bɛ jɔ pewu, o la muso tɛ se ka den sɔrɔ tuguni. A ka c’a la, o bɛ kɛ ka muso si to san 40 ni san 50 ni ɲɔgɔn cɛ. O waati kɔnɔ, koli bɛ to ka cuncun muso kan. A bɛ kalo caman kɛ o la san’a ka tigɛ pewu.
Kun t’a la muso ka kafoɲɔgɔnya dabila koli jɔli kɔnɔ walima koli jɔlen kɔfɛ. Nka muso bɛ se ka kɔnɔ ta hali o waati la. N’a t’a fɛ ka den wɛrɛ sɔrɔ tuguni koli jɔlen kɔfɛ, a ka kan ka tɛmɛ ni bange kɔlɔsi fɛɛrɛw ye fo kalo 12.
Ni koli jɔli daminɛna, a bɛ kɛ muso hakili la ko a kɔnɔma don. Kalo 3 walima kalo 4 koli jɔlen kɔfɛ, ni muso ye basi ye, a bɛ kɛ a ɲɛ na ko kɔnɔtiɲɛ don. Muso san 40 walima san 50 mana basi ye tuguni kalo damadɔ koli jɔlen kɔfɛ, aw b’a ɲɛfɔ a ye k’o tɛ basi wɛrɛ ye, nka a ka koli de bɛna jɔ pewu.
Koli jɔli sen fɛ, musow bɛ tɔɔrɔ caman sɔrɔ i n’a fɔ nisɔngoya, fari kalaya, farifanbɛɛdimi, ani dusutiɲɛ. Nin bɛɛ kɔfɛ, koli bɛ jɔ pewu, musow bɛ lafiya sɔrɔ.
Basibɔn walima kɔnɔdimi gɛlɛn bɛ muso minnu minɛ koli jɔli sen fɛ, walima koli jɔlen kɔfɛ ni basi bɛ bɔn tuguni, u ka kan ka taa dɔgɔtɔrɔso la k’u yɛrɛ lajɛ ni kuru sigilen t’u kɔnɔ (sɛbɛn ɲɛ Muso ka barakɔrɔladimi lajɛ).
Koli jɔlen kɔfɛ, muso kolo fanga bɛ dɔgɔya ani fana a kari bɛ diya. Walasa kolo ka fanga sɔrɔ, muso ka kan ka kolo sinsin dumuniw dun (calcium, sɛbɛn ɲɛ Dumuni ɲumanw, minnu da man gɛlɛn lajɛ).
Komi a tɛna den wɛrɛ sɔrɔ tuguni, o b’a to a bɛ se k’a janto a mɔdenw na, ka baara wɛrɛw kɛ a ka sigida kɔnɔ. A dɔw yɛrɛ bɛ se ka kɛ tinminɛmuso ye walima kɛnɛya baarakɛlaw ye u ka diɲɛlatigɛ tɔ kɔnɔ.