Sigida 11 Balo nafama
Sababu caman bɛ kɔngɔ ni balodɛsɛ la. A sababu dɔ ye fantanya ye. Duniya yɔrɔ caman na, dugukolo ni nafolo bɛ mɔgɔ dama dama dɔrɔn de bolo. Mɔgɔw bɛ kafe, sira, kakawo walima kɔɔri sɛnɛ walasa ka wari caman sɔrɔ, nka nafa foyi tɛ u la balo ko ta fan fɛ.
Walima faantanw bɛ yɔrɔ fitiniw singa ka u sɛnɛ, o yɔrɔtigiw bɛ tila ka sumanw fanba bɛɛ ta u ka yɔrɔ sara ye. Kɔngɔko ni balodɛsɛ tɛ ban abada ni mɔgɔ ma a lajɛ ka ɲɔgɔn dɛmɛ.
Nka fɛɛrɛ wɛrɛw bɛ yen, faantanw bɛ se ka minnu kɛ walasa ka dumuni ɲuman dun ka sɔrɔ u ma musaka caman bɔ. Ni u bɛ dumuni kɛ ka ɲɛ, u bɛ fanga sɔrɔ ka u ka hakɛw ɲini. Balo ɲumanw sɔrɔcogo fɛɛrɛ caman ɲɛfɔlen don sɛbɛn ɲɛ Balocogoyiriwali fɛɛrɛw ni a nɔfɛtaw la.
O fɛɛrɛ dɔw ye ka dugukolo bila a ka a lafiɲɛ, walima ka sumanw sɛnɛ bɔ ɲɔgɔn kɔrɔ; ka u dan tiri kan ani ka ji woyo suman kɔrɔ. U bɛ se ka jɛgɛmara, shɛmara, sumaw ladoncogo ɲuman ani nakɔsɛnɛ kɛ. Ni duguden bɛɛ, walima du dɔw farala ɲɔgɔn kan ka baara dɔw kɛ, yɛlɛmaba bɛ se ka don balo ko la.
Ayi
Ɔwɔ
Ni wari bɛrɛ tɛ aw bolo, ani ni aw b’a fɛ ka aw den dɛmɛ a ka fanga sɔrɔ: aw kana minfɛn sukaromaw walima sukaromafɛnw san a ye; aw ye shɛfanw, tigaw, jiridenw, nɔnɔkɛnɛ walima nɔnɔkumu san a ye.