U ye suguya 3 ye: Minnu bɛ don mɔgɔ kun na, fari la ani minnu bɛ sɔrɔ fari simayɔrɔ bɛɛ la. Ɲimiw ni ngarangaw bɛ ŋɛɲɛ, wololabanaw walima gɛnɛgɛnɛ bila mɔgɔ la. Walasa ka aw yɛrɛ tanga ɲimiw ni ngarangaw ma, aw bɛ saniya matarafa.
Aw bɛ to ka dɛbɛnw, dilanw, daraw, kunkɔrɔdonnanw ni birifiniw bila tile kɔrɔ. Aw bɛ to ka aw ko ani ka aw kunsigiw kɔrɔlaw ko ka jɛ. Aw bɛ to ka denmisɛnniw kungolo lajɛ. Ni aw ye ɲimi walima ngaranga ye denmisɛn kelen na, aw bɛ kɔn ka denmisɛn bɛɛ furakɛ; ni o tɛ u bɛ a yɛlɛma ɲɔgɔn fɛ. A bɛ denmisɛn min na, aw kana a to o tigi ni denmisɛn tɔw ka si ɲɔgɔn kan.
Ni a bɛ kungolo la walima ni a bɛ sɔrɔ fari yɔrɔ wɛrɛ la: Aw bɛ se ka ɲimi silatunu ni aw kunsigi koli ye kosɛbɛ miniti 10 ɲɔgɔn safinɛ ni kungolokosafinɛji la. Aw bɛ a sananko ka tila ka a pɛɲɛ ni kunpɛɲɛnan ɲinmisɛnni dɔ ye ka ɲimiw ni u fanw bɛɛ bɔ. Aw bɛ o kɛ don o don fo ka se dɔgɔkun 2 ma.
Aw kana kungolokosafinɛji kɛ aw kun na, fɛnɲɛnamafagalan (lindane) bɛ min na, barisa ale sɛgɛ ka ca.
Ni safinɛji gansanw ma se ka mako ɲɛ, pirɛtirini (pyréthrines) (izinitigiw tɔgɔ RID) walima pirɛmetirni (perméthrines, izinitigiw tɔgɔ Nix) bɛ min na, o bɛ se ka mako ɲɛ, nka ni aw bɛ o kɛ, aw bɛ a kɛcogo bato. Aw kana a to a ka se aw ɲɛ ma, fana aw bɛ jateminɛkɛ ni farikolo bɛ se ka a kun. Musokɔnɔma ni denmisɛn minnu tɛ san 2 bɔ, olu man kan ka kɛ.
Ɲimi furakɛlen kɔfɛ, aw bɛ aw jija ka u fan bɛɛ silatunu. Ni aw ye fanw to yen u ka tɔrɔ, ɲimi bɛ segin ka don aw kun na tuguni. Mɔgɔw ye furakɛcogo caman lajɛ, nka kunpɛɲɛ matarafali de ɲɔgɔn tɛ. Aw bɛ aw kun pɛɲɛ don o don fo dɔgɔkun 2 walasa ɲimiw ni u fanw bɛɛ ka bɔ kunsigi kɔrɔ.
Ni ngaranga don: Aw bɛ aw ko ni jikalan ye don o don fo tile 10. Ni aw ye aw ko ni jikalan ye, aw bɛ tila ka aw kanka ni safinɛ ye ka aw ko ka jɛ. Aw bɛ aw simayɔrɔ bɛɛ pɛɲɛ ni pɛɲɛɲimisɛn ye. Ni aw bɛ se, aw bɛ a furakɛ i n’a fɔ maɲa. Aw bɛ aw jija aw ka finiw ni aw ka dilan saniyalen ka to waati bɛɛ.