Balodɛsɛ min bɛ dankari kɛ wolo la ani wololabana wɛrɛ minnu bɛ sɔrɔ balodɛsɛ fɛ

Nin bana in bɛ sɔrɔ balodɛsɛ fɛ, a bɛ fiɲɛ bila wolo la. Bana in bɛ mɔgɔw sɔrɔ minnu ka dumuni fanba ye sumamugu jɛmanw ye (kɛrɛn­kɛrɛnnenya la kaba) ka a sɔrɔ fɛn wɛrɛw tɛ fara a kan, i n’a fɔ: Sogo, shɛfan, yiridenw ani nakɔfɛn kɛnɛw.

A taamasiɲɛw

Ni bana in bɛ baliku la, a wolo bɛ ja i n’a fɔ a jeninen don, sango tile bɛ sigi yɔrɔ minnu kan:

Bolow

Kan kɔfɛ

Tɔn ani senkalaw

Ni a bɛ denmisɛnni na, nɔfinman dɔw bɛ ye a senkala la. Tuma dɔw la, a senw bɛ funu.

Joli misɛnniw walima nɔfiman

Walima senkalaw fununi.

Ni nin lahalayaw bɛ yen, tuma dɔw la, i bɛ a sɔrɔ balodɛsɛ taamasiɲɛw wɛrɛw fana bɛ kɛ yen: kɔnɔfunu, joli daku fila la, joli nɛn na, fanga dɔgɔya, dumunikɛbaliya, o ni a ɲɔgɔnna wɛrɛw (aw ye sigida 11 lajɛ, gafe ɲɛ A bɛ dɔn cogodi ko balodɛsɛ bɛ mɔgɔ la? ni Balodɛsɛ suguya wɛrɛw).

Denw ka balodɛsɛ (gafe ɲɛ Serebana lajɛ) ye bana ye min bɛ sɔrɔ dumuni dafalen dunbaliya fɛ (sogo, nɔnɔ shɔ). A bɛ wolo ja ka a ɲɛ fin, ka a foolo bɔ i n’a fɔ a jeninen don. A bɛ ji sigi kɔnɔbara ni senw wolo kɔrɔ.

A furakɛcogo

• Dumuni nafama dunni de bɛ balodɛsɛ kɛlɛ. Don o don mɔgɔ ka kan ka a lajɛ ka shɛ, sogo, jɛgɛ, shɛfan, foromazi, nɔnɔ, jiridenw ni nakɔfɛnw dun.
• Balodɛsɛ jugumanba ni a suguya wɛrɛw la, witaminiw tali bɛ se ka dɛmɛ kɛ, nka dumuni dafalen dunni de nafa ka bon kosɛbɛ. Witamini B hakɛ ka kan ka caya aw ka witamini suguya tataw la, kɛrɛn­kɛrɛnnenya la niyasini (niacin). Sunbala, datu, ani nɔnɔkumu ye witamini B ɲuman ye.

Sani aw ka dumuni kɛ ka aw fa

Funu ni nɔfiman min bɛ ni cɛni senkala ni a sentɛgɛ la, o sababu ye dumuni nafama dunbaliya ye. A ka dumuni fanba tun ye kaba ye, a tun tɛ dumuni witaminima fosi dun.

Ni aw ye dumu kɛ ka aw fa

Dɔgɔkun kelen kɔfɛ, a ye shɔ ni shɛfan fara kaba kan, sen funu jiginna, nɔfinmanw fana bɛɛ bɛka tunu.

Nin muso in senkala wolo jali sababu ye balodɛsɛ ye. O fana bɛ sɔrɔ dumuni dafalen dunbaliya fɛ a ɲɛfɔra cogo min ka tɛmɛ.

📖 Gafe kɔnɔkow
← Segin kɔfɛ | Taa ɲɛfɛ →