Farilajoli min bɛ sɔrɔ joli bolicogo jugu fɛ
Farilajoli walima joli belebelebebaw walima joli dayɛlɛlen sɔrɔ sababu ka ca (aw ye sɛbɛn ɲɛ Bana minnu bɔlen don olu danfaraw dɔnni gɛlɛyaw lajɛ). O de la, nin joliba walima kelebe basigilen ninnu bɛ bɔ mɔgɔkɔrɔbaw senkuru la, kɛrɛnkɛrɛnnenya la, jolisiraci bɛ muso minnu na. A ka ca a la, u bɛ sɔrɔ joli bolicogo jugu fɛ fari la. Joli basigilenw don wa u bɛ se ka bonya. Kelebe kɛrɛdaw ɲɛ bɛ fin, u bɛ mɛnɛmɛnɛ wa u ka magan. Waati dɔw la, a tigi sen bɛ funu.
A furakɛcogo
- Lafiɲɛbɔli nafa ka bon a furakɛli la.
- A ka fisa ka sen da fɛn dɔ sanfɛ. Aw bɛ aw da ka aw sen da kunkɔrɔdonan sanfɛ. Tile fɛ, aw bɛ to ka aw da ka aw lafiɲɛ. Taama ka ɲi banabagatɔ ma, nka a man kan ka a jɔ ka mɛn wa a man kan ka a sen da fɛn dɔ sanfɛ ka a sigilen to.
- Aw bɛ bandi su kɔkɔji wɔlɔkɔlen na ka o da a kan: aw bɛ kutu fitini ɲɛ 1 kɔkɔ kɛ ji wulilen litiri 1 na. O kɔfɛ, aw bɛ a siri ni bandi sanuman dɔ ye.
- Ni joli ka jugu, aw bɛ to ka a ko ni pɛrimanganatiji ye (aw bɛ furakisɛ 1 kɛ ji litiri 1 na).
- Ni joli kora ka jɛ, aw bɛ tulu ɔkisidi zɛnkima (pommade à l’oxyde de zinc) mu a la ka a bila fiɲɛ na.
- Walasa joli ka kɛnɛya joona, a ka fisa kosɛbɛ a tigi ka dumuni nafamaw dun.
- Ni joli kɛnɛyara, aw bɛ bandi meleke a la. Aw kana to fɛn ka yɔrɔ sɔrɔ, barisa hali birintili fitini bɛ se ka kɛ joli kura wɛrɛ ye.
Walasa ka aw tanga joli sɔrɔli ma, aw ye kurukuruniw furakɛ joona.
📖 Gafe kɔnɔkow
← Segin kɔfɛ | Taa ɲɛfɛ →
