Nɔ jɛman jɛmanw ɲɛda ni farikolo tɔ la

Nɔjɛman jɛmanniw minnu bɛ to ka bɔ denmisɛnw ni balikuw kan, u disi, ni u kɔ la, olu sababu ye banakisɛ ye min bɛ wele ko bugun. Farafɛgɛmani bɛ se ka da nɔ jɛman in bɔyɔrɔ la, o tɛ mɔgɔ ŋɛɲɛ wa fana basi tɛ.

A furakɛcogo

• Aw bɛ kiribi dɔɔni ni jiridentulu caman dilan ɲɔgɔn fɛ, ka o mu a yɔrɔ la don o don fo ka nɔ ninnu tunu. Walima aw bɛ banakisɛfagatulu dɔ mu a la (gafe ɲɛ Wololabanaw ni bugu wɛrɛw la).
• Tiyosulifati kɔkɔma (thiosulfate de sodium) ye a fura ɲumanba ye (fura in bɛ se ka sɔrɔ fototalaw ni tubabubagamafɛnfeerelaw bolo). Aw bɛ kutu kunbaba ɲɛ 1 ta fura in na ka o yeelen wɛri tilancɛ ji la ka sɔrɔ ka o mu aw fari la. O kɔ, aw bɛ kɔrimugu su winɛgiriji la ka o kɛ ka a yɔrɔ jɔsi.

• Walasa nɔ ninnu kana bɔ aw fari la tuguni, aw bɛ segin nin waleya in kan tile 15 o tile 15.
• Silifiri seleniyɔmulama, sulfure de sélénium (aw kolen kɔfɛ banakisɛfaga safinɛ na). Aw bɛ safinɛ to aw fari la fo miniti 15. Aw bɛ segin o kan don o don tile 15 kɔnɔ.

Nɔ jɛmanni wɛrɛw bɛ yen minnu bɛ ye denmisɛnw dafuruku la. A lamini finnen don ka tɛmɛ bugun ta kan. O nɔ ninnu tɛ bana ye, wa kojugu wɛrɛ tɛ. A ka ca a la, ni denmisɛnni bɛka kɔrɔbaya, u bɛ tunu u yɛrɛ ma. Aw kana safinɛ farinmanw kɛ ka a ko, aw bɛ tulu mu a la. Furakɛli foyi wɛrɛ kun tɛ.

Nin nɔ ninnu si sababu tɛ jolidɛsɛ ye. Witamini ni fangasɔrɔfuraw tali tɛ u latunu fari la. Nɔ minnu bɛ bɔ dafuruku dɔrɔn na, kun tɛ olu furakɛli la.

Aw ye aw janto nin na: Tuma dɔw la, nɔ jɛmanw bɔli ye kuna taamasiɲɛ ye. Nɔ jɛmanw minnu bɛ kuna kofɔ, olu ɲɛ tɛ jɛ kosɛbɛ, ani fana, a bɛ se ka kɛ u tɛ mɔgɔ dimi hali ni aw ye pɛngili turu u la. Ni kuna ye aw ka sigida bana ye, aw bɛ taa denmisɛnni lajɛ dɔgɔtɔrɔso la ni kuna tɛ a la.

📖 Gafe kɔnɔkow
← Segin kɔfɛ | Taa ɲɛfɛ →