Dabiw ye fɛnɲɛnamaniw ye minnu bɛ u dogo matelaw kɔnɔ, dilanw na, sokɔnɔminɛnw na ani kokow la. U ka teli ka mɔgɔ kin sufɛlaw de la. U kulu bɛ kinni kɛ walima u bɛ tugun ɲɔgɔn nɔfɛ.
Walasa ka dabiw faga, aw bɛ dilanw ni finiw bila jikalan na, walima ka u yangan tasumafunteni na (funteni min ka ca ni degere 50 ye) fo miniti 20 ɲɔgɔn. Ni aw bɛ se ka bɔgɔjɛ walima bugurijɛ (farafinfɛnɲɛnamanifagalan) sɔrɔ, aw bɛ o funfun dilan kɛrɛfɛlaw la, o bɛ dabiw gɛn. Aw bɛ se ka dɔ funfun matelaw, liw ni aw siyɔrɔw la. Aw bɛ se ka alikɔli ni finikosafinɛ ɲagami ji la. Aw bɛ o funfun dabiw dogoyɔrɔ bɛɛ la, ka to u ka ja. Aw bɛ o kɛ siɲɛ caman dɔgɔkun 2 kɔnɔ. Pirɛtirini (pyréthrine) walima pɛrimetirini (perméthrine) (min kofɔra ɲimiw furakɛli la), o fana bɛ se ka mako ɲɛ. Walasa ka aw yɛrɛ tanga dabiw ma, aw bɛ to ka dilanw ni matelaw bila tile kɔrɔ.