Fari bilenni ni fariŋɛɲɛw (Faritanabanaw)

Dumuni dɔw, fura dɔw ni fɛn wɛrɛw bɛ se ka mɔgɔ dɔw fari bilen ani ka a ŋɛɲɛ walima ka ko wɛrɛ bila u la (aw ye Faritanabanaw yɔrɔ lajɛ, sɛbɛn ɲɛ Faritanabanaw la). Tumuw fana bɛ a kɛ.

Tarani ye kurukuruw walima sumuni finmanw walima bilenmanw ye minnu bɛ funufunu fari la, ŋɛɲɛjugu bɛ minnu na fana. U bɛ bɔyɔrɔ falenfalen fari la.

A gɛlɛya belebeleba dɔw sababu ye furaw ye, kɛrɛn­kɛrɛnnenya la penisilini, anpisilini (ampicilline) pikiri, tetanɔsi serɔmu, bagakɛlɛserɔmuw ani bolocifura minnu dilannen don ni so farilaji ye.

Yɔrɔw bɛ bilen miniti walima tile dama dɔrɔn pikiri kɛlen kɔfɛ.

Ni mɔgɔ farilajɛdon, fari yɔrɔ dɔw bɛ bilen, i n’a fɔ u bɛ se ka jɛya fana, u bɛ bonya i n’a fɔ dondoli kinda; a ŋɛɲɛ ka bon. Pikiri dɔ kɛlen kɔ, ni fari yɔrɔ dɔ bilenna walima ni a ye nɔ bila fari la, aw bɛ o fura kɛli dabila pewu. O bɛ mɔgɔ kisi faritanabana wɛrɛ ma aw ye sɛbɛn ɲɛ Gɛlɛya minnu bɛ sɔrɔ fura dɔw pikiri fɛ lajɛ).

Sidabanakisɛ bɛ mɔgɔ minnu joli la, olu ka fura tataw bɛ kurukuruniw falen fari la, kɛrɛn­kɛrɛnnenya la kotirimɔkizazɔli, cotrimoxazole ni newirapini, nevirapine (aw bɛ kunnafonni ɲini dɔgɔtɔrɔsola). Tuma dɔw la, o kurukuruniw bɔli bɛ se ka bali ni fura dɔɔni tali ye, ka to ka dɔɔni dɔɔni fara a tata kan fo ka se a tata hakɛ yɛrɛ ma.

Ŋɛɲɛ furakɛcogo

• Aw bɛ aw ko jisuma na, ka bandi sumanen walima ka finimugu su jisuma na, ka o da a yɔrɔ la.
• Ni ŋɛɲɛ ka jugu kosɛbɛ, aw bɛ ŋɛɲɛfura dɔ ta i n’a fɔ kulɔrifenamini, chlorphénamine.
• Ni aw ye bandi su gɔmiji la, o bɛ ɲɛɲɛ tigɛ. Aw bɛ se ka sumakisɛ dɔ kɛ jikalan na, ka o sɛnsɛn, ni a sumana, aw bɛ bandi su o la, ka da a yɔrɔ la.
• Walasa denyɛrɛni kana a fari yɔrɔ bilennenw siyɛn, aw bɛ a sɔniw tigɛ ani ka gan walima sɔsɛti don a tɛgɛw la.

📖 Gafe kɔnɔkow
← Segin kɔfɛ | Taa ɲɛfɛ →