Joli minnu bɛ bɔ banabagatɔ la ka a sababu kɛ yɛlɛmabaliya ye dilan kan

Ni banabagatɔ tɛ yɛlɛma dilan kan, joli ninnu bɛ bɔ a la kɛrɛn­kɛrɛnnenya la mɔgɔkɔrɔba minnu fanga dɔgɔyalen don. Nin joli ninnu bɛ bɔ kolomayɔrɔ de la banabagatɔ fanga bɛ digi yɔrɔ minnu kan: solokolo la, kɔ la, nɔnkɔnw na ani senw na.

Yɛrɛtangacogo o joliw ma

• Aw bɛ to ka banabagatɔ yɛlɛma yɛlɛma waati bɛɛ: ka a da a kɔ kan, a kɔnɔ kan, ani a kɛrɛw kan.
• Aw bɛ to ka a tigi ko don o don, ka tulu mu a la.
• Aw bɛ to ka dara giriman dɔ da dilan kan; ka to ka u falen don o don ni u nɔgɔra.
• Aw kana a tigi dalen to dara ɲiginnen kan.
• Aw bɛ kunkɔrɔdonnan don banabagatɔ kɔrɔ, o bɛ a to a tigi wolo tɛ bɔsi. Aw bɛ to ka u bilayɔrɔw falen waati bɛɛ.

• Aw bɛ a tigi labalo ka ɲɛ. Ni a tɛ dumuni kɛ ka ɲɛ, witamini fangamaw ani joliseginfuraw bɛ se ka di a ma walasa a ka fanga sɔrɔ (aw bɛ sɛbɛn ɲɛ Witaminiw laje).
• Bana basigilen juguman bɛ denmisɛnni min na, o ba ka kan ka to ka a da a sen kan waati dɔw la.

A furakɛcogo

• Aw bɛ bilasiralikan kofɔlen ninnu bato walasa ka aw kisi joli ninnu ma.
• Aw bɛ kɔkɔ dɔɔni kɛ jiwɔlɔkɔlen na ka joli ko ni o ye, walima jisanuman walima ni jolikofura ye min bɛ wele ko dakin. Aw bɛ nin fura 3 ninnu bɔ ɲɔgɔn kɔrɔ. Aw bɛ furakɛli kɛ ni bandi sunuman ye.
• Aw bɛ joliw ko ni jiwɔlɔkɔlen ni safinɛ ye, siɲɛ 3 tile kɔnɔ.
• Aw bɛ sogosu bɛɛ bɔ yen joli da la ka sɔrɔ ka a ko ni jiwɔlɔkɔlen ye.
• Walasa ka joli juguyali bali, aw bɛ di walima sukaro da a la. (di ni sukaro sɔrɔ ka di.) A ka fisa ka joli in ko don o don siɲɛ 2 tile kɔnɔ, ka tila ka di walima sukaro wɛrɛ da a la. Aw bɛ joli ko ka a suniya, ka a ji ja sani aw ka di walima sukaro da a la, ni o tɛ, a bɛ juguya.

📖 Gafe kɔnɔkow
← Segin kɔfɛ | Taa ɲɛfɛ →