Sigida 10 Furakɛli kunfɔlɔ
Kafoɲɔgɔnya min ma laɲini walima min ma kɛ bɛnkan kɔnɔ, o ye binnkanni ye. Bin bɛ se ka kɛmuso walima npogotigini kan u yɛrɛ dɔnbagaw fɛ, dunanw, denbaya kɔnɔ mɔgɔ dɔ, walima u cɛ walima u ɲamɔgɔkɛ fɛ. Bin bɛ kɛ cɛw ni kamalenniw fana kan.
Bin kɛra mɔgɔ min kan, aw ka kan ka o tigi dɛmɛ joona walasa ka farikolo jogindaw furakɛ. Aw ka kan a tigi dɛmɛ ka a hakili sigi fana. Aw bɛ a tigi furakɛ ni bɛrɛbɛrɛli ni faamuyali ye. Aw kana a tigi jalaki.
Binkani bɛ se ka kɛ kɔnɔta sababu ye. Bangekɔlɔsi fura caman tali bɛ se ka a bali. Aw bɛ bangekɔlɔsifɛɛrɛw lajɛ, sɛbɛn ɲɛ Bangekɔlɔsi fɛɛrɛ teliman. Binnkanni bɛ se ka kɛkafoɲɔgɔnya banaw jɛnsɛnni sababu ye. Aw bɛ dogoyɔrɔbanaw ni u gɛlɛyaw lajɛ gafe kɔnɔ, sɛbɛn ɲɛ Dogoyɔrɔla jolimisɛnniw. Fura dɔw bɛ se ka i tanga sidabana ma, aw ye taa dɔgɔtɔrɔso la.
A bɛ se ka gɛlɛya a tigi ma aw ka a ye walima ka maga a la, o la, aw bɛ a fɛ ka lajɛli ni furakɛli min kɛ, aw bɛ o ɲɛfɔ a tigi ye fɔlɔ, ani ka yamariya ɲini a tigi fɛsani aw ka maga a la.
Banabagatɔ ka lajɛli (kunnafoni) sɛbɛn
Lajɛli don:
Lajɛli waati:
Banabagatɔ ka ɲɛfɔli:
Bana sɛgɛsɛgɛli:
Aw bɛ joginda bɛɛ jateminɛ ka olu sɛbɛn i n’a fɔ nin cogo in. O bɛ aw dɛmɛ ka a dɔn ni a tigi bɛ ka kɛnɛya. O bɛ se ka aw dɛmɛ tuma min na aw bɛ a lajɛ ni a bɛ a kɛnɛya. Fana, o bɛ se ka kɛ dalilu ye polosiso la ni aw kɛra taafɛn ye yen.
Ni a tigi musoya cira (farala), tigɛra walima ka birinti, olu tɔɔrɔ bɛ se ka bonya. Aw bɛ asetaminofɛni walima ibiporofɛni di a ma. Ni joli bɔnta ka ca banakɔtaayɔrɔ walima musoya la, aw bɛ fɛɛrɛ kɛ walasa ka joli jɔ. Aw bɛ a kɛcogo jira a tigi la walasa a ka a kɛ a yɛrɛ ye ni joli kɛra segin fɛn ye tuguni.
Ni joginda misɛnniw don, a tigi bɛ a sigi ji wɔlɔkɔlen na siɲɛ 3 tile kɔnɔ. Ka to ka ji seri musoya la sugunɛ kɛtɔ, o bɛ dɔɔni bɔ dimi na. Joginnidabaw ka kan ka kala (aw ye sɛbɛn lajɛ ka a ta ɲɛ Jogindaw la ka taa a bila ɲɛ Joginda kalali la).
Jogindaw ɲininen kɔfɛ, aw bɛ nin sigida in yɔrɔtɔw lajɛ walasa ka gɛlɛya kɛrɛnkɛrɛnnenw dɔn. Dɔgɔtɔrɔw ka lajɛli sɛbɛn nafa ka bon kosɛbɛ sango ni o muso taara polosiso la joginni tɛmɛnen kɔ ka mɛn.
Aw bɛ o muso kɔlɔsi tile damadɔ kɔnɔ walasa ka a dɔn ni basi tɛ a hakili ni a farikolo la.
Aw bɛ a jogindaw lajɛ ni banakisɛ taamasiɲɛ tɛ a la (aw ye sɛbɛn ɲɛ Joginda bɛɛ bɛ se ka juguya lajɛ) kɛrɛnkɛrɛnnenya la, sugunɛbaralabana (aw ye sɛbɛn ɲɛ Ɲɛgɛnɛsiralabana minnu tɛ sɔrɔ cɛ ni musoya fɛ; ni u tɛ yɛlɛma mɔgɔ fɛ lajɛ) ka ca binnkanni walima kafoɲɔgɔnya wajibiya kɔfɛ.