Sigida 10 Furakɛli kunfɔlɔ
Kirinni bɛ bala ka kɛ, a ka ca a la a tɛ mɛn, mɔgɔ tɛ bɔ a yɛrɛ kalama waati min walima a hakili ɲagaminen don, tuma dɔw la a bɛ kɛ ni sɛrɛkɛsɛrɛkɛli ye.
Kirikarali bɛ se ka sɔrɔ fariganba fɛ, farilaji dɔgɔya, sumayabana, bagamafɛnw walima sababu wɛrɛw fɛ. Kirikarali min bɛ tɛmɛ siɲɛ kelen kan, o bɛ wele kunsɛmɛnabana, aw sɛbɛn ɲɛ Binnibana (kirinni) lajɛ. Ni nin kirikarali sababu jugu ninnu si tɛ, kirikakarali gansan tɛ se ka kɛ bana ye (hali ni o ye a sɔrɔ a tigi yeɲɛna bɛ mɔgɔ siran). Ni mɔgɔ bɛ seri ka bin tuma bɛɛ, aw ye taa a jira kɛnɛyabaarakɛla dɔ la.
Ni mɔgɔ serila ka bin, aw bɛ fɛn bɛɛ mabɔ a la walasa a kana a yɛrɛ bana. Aw bɛ a yɛlɛma a kɛrɛ kan walasa ni a bɛ fɔɔnɔ, a kana kirin a la. Aw kana serikabintɔ minɛ ka a laada walima ka a lajɛ ka a nɛn minɛ.
Mɔgɔ min serila ka bin farilaji dɔgɔya fɛ, aw bɛ taa ni o tigi ye dɔgɔtɔrɔso la. Ni a ɲɛmatigɛra, aw bɛ jimafɛnw di a ma. Aw ye sɛbɛn ɲɛ Kɛnɛyaji lajɛ.
Ni kanjabana ye mɔgɔ ja, aw bɛ taa ni a ye dɔgɔtɔrɔso la. Walasa aw ka kunnafoni caman dɔn kanjabana kan, aw ye sɛbɛn ɲɛ Kanjabana ni kunsɛmɛnabana lajɛ.
Ni sumayabana ye mɔgɔ ja, aw bɛ taa ni a ye dɔgɔtɔrɔso la. Aw bɛ jazepamu, diazepam di a tigi ma sani aw ka se dɔgɔtɔrɔso la (aw ye sɛbɛn ɲɛ Jazepamu, Diazépam lajɛ). Aw bɛ a furakɛ ni sumayafuraw ye (aw ye gafe ɲɛ Sumayafuraw lajɛ).
Ni mɔgɔ jara ka tɛmɛ miniti 15 kan, aw bɛ jazepamu jilama kɛ a banakɔtaayɔrɔ fɛ ni pikirikɛlan biɲɛntan ye. Aw ye fura dita hakɛ lajɛ sɛbɛn ɲɛ Jazepamu, Diazépam la.
Mɔgɔw bɛ se ka fili ka nɛgɛtigɛbana jali kɛ binnibana yɛrɛ ye. A tigi dagalakaw bɛ sigi ɲɔgɔn kan ka gɛrɛntɛ (Dagalaka sɔgɔ). A kɔ bɛ bala ka kuru. Walasa ka aw kalan nɛgɛtigɛbana taamasiɲɛ fɔlɔw jateminɛcogo la, aw ye sɛbɛn ɲɛ A taamasiɲɛw lajɛ.
Jali kɔfɛ, a tigi hakili bɛ se ka ɲagami walima a bɛ kɛ i n’a fɔ sunɔgɔ bɛ a la. Aw bɛ a dɛmɛ a ka lafiya sɔrɔ.